Ma’lumki, har bir davlatning o‘z milliy ramzlari muhim ahamiyat kasb etadi. Mustaqillikni, taraqqiyotni ta’minlovchi vosita ham aynan davlat ramzlari desak, mubolag‘a bo‘lmaydi. Bizning mamlakatimiz ham uzoq yillik mashaqqatlardan so‘ng istiqlol oftobi yorqin nur sochgan 1991-yilning 31-avgust sanasida o‘z mustaqilligini rasman qo‘lga kiritdi. Ushbu kun millatimiz tarixining zarvaraqlariga oltin harflar bilan muhrlandi. Mustaqillikdan so‘ng birin-ketin davlatimiz ramzlari – mamlakat bayrog‘i, gerbi va madhiyasi qabul qilindi. 1992-yil 8-dekabrda esa xalqimizning, davlatimizning dunyodagi mavqeyi, istiqbolini huquqiy jihatdan mustahkamlagan va kafolatlagan muhim hujjat, Bosh Qomusimiz – O‘zbekiston Respublikasi Konstitutsiyasi qabul qilindi.